الشاعر محمد مصطفى
مثل السمك تعلق عاسنّاره
| كل يوم كنتِ تعملي زيارة |
| ع بيتنا عُنوي عن الحاره |
| عرفت الحارة بسرّنا المكتوم |
| وصارت الجارة تخبّر الجاره |
| العزّال شغلتها علينا تلوم |
| وتلحّق الغاره ورا الغاره |
| ونحنا علينا بالدموع نعوم |
| بدرب المحبّه نسدّ عبّاره |
| ضجّت الحاره وصدّقوا المرسوم |
| بذنوب ما إلها ولا غفّاره |
| تاجرّصونا وحمّلونا هموم |
| بدها تجي لعندي ومحتاره |
| أوطبت إلها طريق هجوم |
| تاما تجي وتضلّ جباره |
| أفضل ما تكشفنا العيون عموم |
| ومتل السمك نعلق عاسنّاره |
غزل
| لا تغضبي بيدبل زهر نيسان |
| معليش راضي ولو كنت زعلان |
| ابتسمي تحتّى يرتوي العطشان |
| ويرهج الّلولو بميّة الكوثر |
| كل عمرا الكَركة السمرا |
| تسكر عليها شفّه الحمرا |
| بالعكس ريقك دوّخ الخمرا |
| صار القدح عاشفّتك يسكر |
| الله كتب عاجبهتك آيات |
| بسمات غنيّات حوريات |
| في كل قلب بتزرعي نبلات |
| ومع كل غمزه مجنّدي عكسر |
شروقية
| يا ساكني في بيت أبعد بيت في بيروت |
| طلّي عليّ وحنّي على قلب غاشي |
| ولسان حالي ومالي التزم بسكوت |
| وبعدك بتِقوي ع أهل الهوى بطّاشي |
| بالشه مرّة بتجيني لهوة البسكوت |
| طفل على زند الهوى بيفيق إنعاشي |
| موتور عمري احترق رشّي عليه زيوت |
| وندّي عليّ زهور الخدّ رشاشي |
| ثلاثي سنين الجفا بحكي حكي مثبوت |
| جيتي ع بيتي خفتي يشوفك الواشي |
| وهلّق دخلتي البيت شفتو قد عشر بيوت |
| دبكت حجاروا فرح قطروا على الحاشي |
شروقية
| ضلّي وعديني وغيبي شهور وانسيني |
| وعدك الكاذب بهجرانك يسلّيني |
| بتخايلك جاي وعليك من الوقار ثياب |
| في عكس حوّا القديمي وثوبها التيني |
| بتخايلك جاي عادرب ملفلفي بجلباب |
| بغطّي حلاك بخبّي زينة الزيني |
| بيغوي مراهق وشب وكهل تسعيني |
| وبتخايلك ريمة فلا من حول منها دياب |
| وحدي الحارس عابابك رح تلاقيني |
| ومن بعد ما بخلّصك من غدر أهل الغاب |
| لا تفكّري مقابل عمل واجب تكافيني |
| بتخايل البسمه عاتمّك من خلف الحجاب |
| بسمة رضاك عليّ يا تقبريني |
افتتاحية
| بشو بدّي قصيدي استهلّو |
| بآه وآخ جرح القلب ملّوا |
| دِما وهموم غيم الجو هامي |
| عليّ وبطّلوا نجوموا يهلّوا |
| إجاني الحرب صبّغلي الحمامي |
| بلون غراب يلسعني بصلّو |
| ومسيحي ومسلم اثنين الأسامي |
| لهن ميمين من أول ما طلّوا |
| ولهن مدّي عا خط الاستقامي |
| متفقين ما في يوم خلّوا |
| أنا رح جيب حزوره وعلامي |
| احذروها ورمزها لإسمين حلّوا |
| إن قصتوا تفرقوا منّا الشهامي |
| وحبال الأصدقاء فينا تحلّو |
| إحذفوا الميمين عنوان الكرامي |
| وعطونا حروف من غير أبجدية |
| إذا قدرتو خدوا لبنان كلّو |