الشاعر طليع حمدان
مبارح متل هلق
| مبارح متل هلّق سوا كنّا |
| وكان الورد فينا وطلع منّا |
| وتمو التحنّا بخمرك المعصور |
| جايي عَا بالو اليوم يتحنّا |
| ضيّعت صوتي بصوتك المسحور |
| لما سوا إحساسنا تغنّا |
| متل السوا سمعو غناني طيور |
| وما بيعرفو مينو القبل غنّا |
| ملتي عليي خصر صرنا خصور |
| وشفي جنا عاشفة الجنّا |
| وكل ما شربت من جدول المنتور |
| قلو بعد ويقول بتمنّا |
| كان الهنا ما زارنا من شهور |
| وكان فينا بعد نتهنّا |
| بكير لحظات اللقا المحرور |
| خلصو تَا فلينا غصب عنّا |
| وفَلّ يوم مبارح ومقهور |
| ليش دخلك فَلّ يتأنا |
| إلنَا بَنَى بيت بزهر وعطور |
| واليوم راح البيت والبنّا |
| بكرا تعي دموع الربيع نزور |
| يما مع شفافك يجو لعنّا |
| يعصرهن علينا صباح النور |
| ومع بعضنا من جديد يعجنّا |
| والحب يخبرنا على تنور |
| عَا آخرو نزدلو حرف منّا |
| تَا يصير تنوره ملاني زهور |
| كنا سوا فيها أنا وإنتي |
| ومعها رجعنا متل ما كنا |
حوض ورد
| حكيتي معي والشوق لهفّتو |
| عَا لحن لا سمعتو ولا عزفتو |
| من صوتك عرفتك حنوني كتير |
| وكل البعد ما بعرفو عرفتو |
| عرفت فيكي ليل ومشاوير |
| وفيكي فجر طالع بهفهفتو |
| وفيكي الربيع محمّمك بكير |
| وجايبلك من الزهر منشفتو |
| لكن أنا سبقتو حلم عَا سرير |
| شربت الندى عليكي تا نشّفتو |
| ولقيت فيكي طير ما بيطير |
| وحدو مخبّا بريش عاطفتو |
| وحلِمت فيكي حبوب للتخدير |
| منهن عَصَرت نبيذ ورشفتو |
| وحلمت فيكي حوض ورد زغير |
| شميت عطرو بس ما قطفتو |
| ومنديل عن تمّك بلا تفكير |
| زحتو حلتمك طفل كشّفتو |
| وبكرا إذا يقظه الحلم بيصير |
| بقلّك لقيتك متل ما حلمتك |
| وشفت اللي شفتو قبل ما شفتو |
| كان عمري يا حياتي راح |
| ولما زماني دلّني عليكي |
| حسّيت إيامي اجو سواح |
| وعم ينزلو عَا شط عينيكي |
| ومهما المناظر يسحرو العينين |
| السواح منهن يمكن يملّو |
| ويمكن يفلّو بيوم وبيومين |
| لكن عيوني وين بيفلّو |
| إنتي بلادي وساحره النظرات |
| بتلالك الخضرا وسواقيكي |
| وشِعري الحنون وبحة النايات |
| ما بلاقيهن تا لاقيكي |
| وسواحك النهدات واللهفات |
| ودمعات ببكيهن تا اسقيكي |
| بعد البكي ما بيرجعو الدمعات |
| مطرح ما وصلو بينتهو فيكي |
| يا ريت حدّك بنتهي يا ريت |
| ولا كل مدّي تصيبني كريزه |
| ولاتوقّفيني قبال باب البيت |
| متل سايح ما معو فيزه |
| وحياة عينيك اسأليلي الباب |
| الخفتي تا يحكي عَنك سكوتو |
| ليش منك يطعم الما ذاب |
| وليش اللي ذاب بيحرمو قتو |
| وأغراب ليش بيلتقو أحباب |
| عَا باب عم بيقلهن فوتو |
| وأحباب ليش بيلتقو أغراب |
| وعَا بعضن بيبقو رح يموتو |
| ويوم الحياة بعمرنا مشلول |
| متل المريض الناطر الساعة |
| يطلّع حزين بساعتو ويقول |
| قديش بعد بعيش يا ساعة |
| يا ريتنا منفل سكرانين |
| متل النهور البين لبساتين |
| شبابيكنا من الورد وجراحو |
| وبوابنا وراق الندي الحلوين |
| وقلوبنا من الخوف يرتاحو |
| وتخلص عَا خد الباب كلمة مين |
| لا الرايحين نشوفهن راحو |
|
ولا الراجعين نشوفهن جايين |